फुलको यात्रा नाटकमा फरक क्षमता भएका कलाकारहरूको सशक्त अभिनय

• परशुराम राई । काठमाडौं, साउन १५ गते ।
नाट्यकर्मी सौभाग्य सिंह राईद्वारा लिखित एवं निर्देशित नाटक ‘फुलको यात्रा’ शुक्रबार नेपाल नाट्यशाला, काठमाडौंमा मञ्चन गरिएको छ । फरक क्षमता भएका कलाकारहरूको सशक्त अभिनय र मल्टिमिडियाको प्रभावकारी प्रयोगले सजिएको नाटकले समावेशी शिक्षा, प्रकृतिमैत्री सिकाइ तथा बालमनोविज्ञानको महत्त्वलाई प्रस्तुत गरेको छ ।
यस नाटकले आधुनिक समाजमा बालबालिकालाई प्रकृतिबाट टाढा राख्ने, माटो, धुलो र खुला वातावरणमा खेल्न नदिई कोठाभित्र सीमित गर्ने प्रवृत्तिमाथि प्रश्न उठाएको छ । विशेषगरी फरक क्षमता भएका बालबालिकालाई अत्यधिक संरक्षणका नाममा उनीहरूको क्षमता र सम्भावनालाई सीमित गर्ने सामाजिक मानसिकतालाई नाटकले संवेदनशील ढंगले उजागर गरेको छ ।

पटकथाअनुसार शिक्षिका सिमा म्यामले बालबालिकालाई बगैँचामा फूल रोप्न, बिरुवाको हेरचाह गर्न तथा व्यवहारिक र मनोवैज्ञानिक शिक्षामार्फत सिकाइलाई जीवनसँग जोड्ने प्रयास गर्नुहुन्छ । प्रारम्भमा अभिभावकहरू यस अभ्यासप्रति असन्तुष्ट देखिए पनि बालबालिकामा आएको सकारात्मक परिवर्तन, अध्ययनप्रतिको बढ्दो रुचि, शैक्षिक उपलब्धि र भविष्यप्रतिको आत्मविश्वासले उनीहरूको दृष्टिकोण परिवर्तन हुन्छ ।

नाटकले प्रत्येक बालबालिकाभित्र रहेको सम्भावनालाई सम्मान गर्दै, विशेषगरी फरक क्षमता भएका बालबालिकालाई अवसर, विश्वास र व्यवहारिक सिकाइ उपलब्ध गराइए उनीहरू पनि समाजका सक्षम, आत्मनिर्भर र सिर्जनशील नागरिक बन्न सक्ने स्पष्ट सन्देश दिएको छ ।

मञ्चीय प्रस्तुतिमा मल्टिमिडियाको प्रभावकारी प्रयोग, दृश्य संरचना र कलाकारहरूको स्वाभाविक अभिनयले नाटकलाई थप आकर्षक बनाएको थियो । प्रस्तुतीका क्रममा दर्शकहरूले नाटकलाई रुचिपूर्वक अवलोकन गरेका थिए भने समावेशी शिक्षा, प्रकृतिप्रेम र व्यवहारिक सिकाइको सन्देशले विशेष ध्यान आकर्षित गरेको देखिन्थ्यो ।

नेपाल मातृगृह र नेपाल नाट्यशालाको संयुक्त प्रस्तुतिमा रहेको यस फुलको यात्रा नाटकमा निर्मल साउद, किरण काली किरण, सोनी कडेल, प्रतिभा रावत, अमृत देवकोटा, आदित्य शाह, निर्दोष थापा, सजिना गुरुङ, रन्जु कुमारी, रिता कुमारी ठाकुर, इलियाना धामी, रोशनी कार्की, अनुभव चौलागाईं, कृश थापा, सागर बुढा, हसिब अन्सारी, कृतज्ञ रिजाल, करुणा भित्रिकोटी, प्रिन्शा मगर, सायरा मगर, अन्जु बराल, सुष्मा बोमजन तामाङ, महेन्द्र थापा, सौभाग्य सिंह राई (शोभा) लगायत दजनौ कलाकारहरूले अभिनय गरेका छन् ।

नाटकको प्रकाश सञ्चालन अजय घलानले, संगीत सञ्चालन सुदिप सुदिपले तथा ब्याकस्टेज सहयोग सम्झना श्रेष्ठ, नवीन महरा र कविता खड्काले गरेका थिए ।