बेलायतमा सारङ्गी र टुंग्नाको धुनमा कविहरूले सुनाए कविता
युके,
गत २८ सेप्बेटेम्बर २०२४ का दिन एल्डरसटमा आठजना नेपाली कविहरूले सारङ्गी र टुंग्नाको मधुर धुनमा कविता वाचन गरेका छन् । आठ कविले एउटै मञ्चबाट २४ थान कविता सुनाए ।
पहिलोपटक भएको ‘काव्य-सन्ध्या’ नामक कार्यक्रम नितान्त अनौपचारिक शैलीको थियो । अर्थात् कोही पनि सभापति वा अतिथि थिएनन् । दुईघन्टा चलेको कार्यक्रममा मात्र कविता वाचन र संगीतको प्रस्तुति गरिएको थियो ।
कविहरू खुपेन सुनुवार, काङमाङ नरेश राई, जीवन तिवारी, डा. सङ्गीता स्वेच्छा, डा. रूपक श्रेष्ठ, निर्भीकजंग रायमाझी, शान्ति लिम्बू तथा मुकेश राईले आफ्नो तीन तीनवटा कविता सुनाउँदा संगीतकार रोशन महर्जनले सारङ्गी र टुंग्ना बजाइरहेका थिए । उद्घोषण तथा कविहरूलाई मेन्टरिङ गर्ने काम साहित्यकार केदार संकेतले गरे ।
‘साहित्य संगालो, बेलायतको संयोजनमा भएको कार्यक्रमको अन्त्यमा डा. सङ्गीता स्वेच्छा, शान्ति लिम्बू र काङमाङ नरेश राईका नवीनतम कृतिहरूको बिक्रि तथा पुस्तक हस्ताक्षर गरिएको थियो । कार्यक्रमको आयोजना तथा ब्यस्थापन लामो समय देखि संचालनमा रहेको साहित्यसगालो डटकमले गरेको थियो ।