लन्डनमा ‘अबको बाटो’ पुस्तकको विमर्श,कस्ले के भने ? के हो अबको बाटो ?
खेमराज रानाभाट,
लन्डन,
आईतबार, २३ फेब्रुवरीको दिन लन्डनको ह्यारोमा ‘अबको बाटो’ पुस्तकको विमर्श कार्यक्रम भव्य रूपमा सम्पन्न भयो। सम्पादक भरत कुमार श्रेष्ठद्वारा संकलित यस कृतिमा नेपालले हिँड्नुपर्ने मार्गचित्रबारे विभिन्न अनुभवी व्यक्तित्वका लेख समावेश छन्।
कार्यक्रमको प्रमुख आतिथ्य बेलायतका लागि नवनियुक्त राजदूत चन्द्र कुमार घिमिरेले गरेको उक्त कार्यक्रम विभिन्न साहित्यिक संघसंस्थाहरुले आयोजना गरेका थिए । नवनियुक्त राजदूत, कवि तथा लेखक घिमिरेलाई बेलायतमा क्रियाशील विभिन्न साहित्यिक संघसंस्थाहरूले स्वागत तथा पुस्तकको विमर्श कार्यक्रममा नेपालका विगत, वर्तमान र भविष्यको समीक्षात्मक मूल्यांकन गरियो।
राजदूत घिमिरेले आफ्नो मन्तव्यका क्रममा नेपालले विगतमा गरेका कमजोरी र अबका चुनौतीहरूबारे पुस्तकमा प्रस्तुत विचार गहन रहेको बताए। “विभिन्न क्षेत्रका विज्ञहरूबाट नेपालका संभावनाबारे तथ्यगत विश्लेषण गरिनु सराहनीय छ,” उनले भने। उनले पुस्तक संकलनका लागि सम्पादक श्रेष्ठलाई विशेष धन्यवाद समेत दिए।
डा. मिलन ज्ञवालीले आफ्नो लेख ‘साना तथा मझौला उद्योगको पारस्परिक अन्तरसम्बन्ध, एक बिजनेस मोडल’ को चर्चा गर्दै नेपालका २७ सफल साना तथा मझौला उद्योगहरूको अनुसन्धानबाट प्राप्त निष्कर्ष प्रस्तुत गरे। त्यस्तै, पूर्व प्रहरी डिएसपी तथा स्तम्भकार शिवजी श्रेष्ठले “नेपाल प्रहरी र गृहमन्त्री कस्तो हुनुपर्छ” भन्ने विषयमा ऐतिहासिक उदाहरण दिँदै पुस्तकमा समावेश आफ्नो लेख माथि विचार राखेका थिए । उनले सन् १८२२ का बेलायती गृहमन्त्री रोबर्ट पिलको उदाहरण पेश गर्दै नेतृत्व र प्रशासनिक दक्षताको महत्व दर्शाए। “हामीले सत्य लेख्न र बोल्न छाड्नु हुँदैन, किनभने सकारात्मक विचारको कुनै न कुनै दिन सुनवाई हुन्छ,” श्रेष्ठले जोड दिए।
पुस्तक समिक्षकका रूपमा साहित्यकार तथा लेखक डा. रुपक श्रेष्ठले पुस्तकको समग्र पक्षको समीक्षा प्रस्तुत गरे। त्यसैगरी, पुस्तकका परिकल्पनाकार एवं संकलक भारत कुमार श्रेष्ठको व्यक्तित्व र कृतित्वबारे पत्रकार महासंघ यूकेका महासचिव तथा लेखक खेमराज रानाभाटले चर्चा गरे।
कार्यक्रममा लेखक गोपी सापकोटाले राजदूत चन्द्रकुमार घिमिरेले लेखेको ‘डन्ट टच मी ओ कविताहरू’ वाचन गरि कार्यक्रममा साहित्यिक माहोल थपेका थिए ।
साहित्य अनुरागीहरूको उत्साह झन् बढ्दै गयो जब दुर्गा प्रसाद पोखरेल, सुनिल संगम, विनोद अधिकारी, प्रसुन कँडेल, रश्मिता दर्लामी, वाईबी गुरुङ, जया राईलगायतका साहित्यिक सर्जकहरूले आफ्ना गजल, मुक्तक र कविताहरू प्रस्तुत गरे। आध्यात्मिक व्यक्तित्व विष्णु प्रसाद सापकोटाले ‘जीवनमा सन्तुष्टि कसरी प्राप्त गर्ने’ भन्ने विषयमा प्रेरणादायी विचार राखे।
पुस्तकका संकलक श्रेष्ठले आफ्नो धारणा राख्दै भने, “हाम्रो समाजमै रहेका दक्ष र अनुभवी व्यक्तिहरूको ज्ञानलाई एकत्रित गरेर अबको नेपाल निर्माणको मार्गचित्र कोर्न सकिन्छ भन्ने सोचले यो पुस्तकको परिकल्पना गरिएको हो।”
